تصبحوا علي عنف!

                  حماس 2

الصورة الأولي : شرطي من الشرطة التنفيذيةالتابعة لحماس يتعدي علي شاب بالضرب

انت بغزة يعني انت بدك تصحي وتنام علي عنف, امبارح نمت علي خبر انو قيادي فتحاوي في السويد اغتصب بنته اللي عمرها 15 سنة وزوج ماخد حبوب الأترمال ومعتدي علي زوجتو جنسيا ,صباحي اليوم كان انو شفت الشرطة التنفيزية اللي شعارهم "شرطي حكيم يحمي مواطن كريم " ماسكين عصي علي دوار الجامعة ولابسين طواقي واقية ,كنت أطلع نظرة قوية ونظرة احتقار بعيون كل شرطي وبتزكر انو "الشرطة في خدمة الشعب "كل ما بشوف شرطة العنف (الشرطة التنفيذية) بتزكر يوم 15 اذار وقت ما لحقوني علي بيت صحابنا وسحب السلاح عليا وحطو علي ركبي مشان خبطت الفزبة بايدي وقلتلو انتو ببديتو بعنف وانا برد باشي أبسط من البسيط ,فرد عليا بشي أعنف من العنيف الا هو سحب السلاح علي ركبي وتهديدي انو يجيبو الشرطة النسائية وسحب جوالي.بعد ما صار كل هادا بحكي لصحبيتي اللي شفتو وتزكرتو ردت عليا " ما تحكي,انا بديش أسمع قصص عنف ,لإني زهقت هاي القصص"وخلص ."

 
بطلع في الشارع ,مستغربة كيف احنا عايشين او بنتعايش ,مش قادرة أروح جامعة ,اطلع عالشارع ,اشوف الناس ,لإنو ببساطة بكل مكان في عنف ,في انتهاك للحريات والحقوق ,في قهر بقلوب الناس بس مش قادرين يحكو لانو احنا تعودنا انو نقبل كل الأوضاع السيئة,فقررت أرجع عالبيت لإنو هوا المكان الوحيد اللي ممكن يحسسني بالاستقرار والأمان نوعا ما ,وانا في طريقي للبيت ,السواق اللي عمرو يمكن 60 سنة بيقول " الي من الساعة 12 المسا للساعة 4 ونص الفجر وانا بروح من محطة سولار لمحطة تانية مشان  اعبي سولار واجيب فلوس لولادي " ,رد عليه شب في السيارة " بعين الله ,فش اشي بايدنا " ,حكيت براسي "طيب هوا بايد مين ازا مش بايدنا " ,حكي السواق تاني " احنا ما في عنا حقوق ,لا دوا ولا سولار ولا كهربا ولا ميا ولا أمان ولا فلوس موجود ,من وين بدو يكون في عنا حقوق ؟"

01187642743AqSCrxoCQAA-Jh7 
الصورة الأولي :بوست كارد من الرئيس ابو مازن في ايطاليا الي شعبه الفلسطيني المعنف

بس بردو كلو بهون مدام انو رئيس السلطة الفلسطينية محمود عباس ما بيتعرض لعنف او ازا بتعرض لعنف بروح في اجازة أسبوعية زي ما هوا هلأ ,رئيسنا الان في اليابان هوا وناصر اللحام في اجازة اسبوعية وكان قبل هيك في ايطاليا ولكن الأخبار بتحكي انو هوا بناقش التنمية في فلسطين مع خبراء يابانيين ,طيب أنا سألت حالي "بدوش ييجي يناقش التنمية الفلسطينية في غزة ؟"

d8aed988d981 
بتذمر كتير؟ اه ممكن! بس معلش اتحملوني لإنو انا الوضع صار فوق المحتمل ,واحتمال اجي الوقت انو نحكي أبسط الاشياء اللي احنا بنواجهها يوميا . قومو تمردو واكسرو حاجز الخوف وضلكو علي أمل انو رح تغيرو يوما ما!

(أتوقع بعد هالتدوينة رح يصير اشي مش منيح بس بردو انا ضدكو)

Advertisements

شو يعني تكون فلسطيني؟

9998335579                           

أول مرة اكتب من العربي ,زهقت من الانجليزي ,وفي حجات ما بنفع تنحكي بالانجليزي .  المهم ,بعد 18 سنة من الحياة الكريمة في فلسطين ,سألت حالي شو يعني انو اكون فلسطينية ؟ كتير ناس بعرفوش عن فلسطين اشي بسألونا هادا السؤال ,بدي أجاوب بس بعرفش من وين أبدا وايمتي رح اخلص . انا مش متشائمة بالعكس انا متفائلة بس زهقت وقرفت وبدي احكي.

1-فلسطيني يعني تكون مقيدة تحركاتك ,افكارك ,افعالك ,اقوالك ,حرياتك ,كل شي بحياتك من تقاليد شعبك,من حكوماتك ,ومن احتلالك (بالاخر مشان بديش يكون شماعة لكل اشي )وشكرا الهم جميعا.
2-  فلسطيني يعني تعيش بظلام دامس لاكتر من 12 ساعة وتضلك طول اليوم تطلع علي الضو وتتأمل انو يضوي.
3- فلسطيني يعني تتبهدل علي كل مطارات العالم ويكون مشكوك فيك بكل مطار ,حاجز ومعبر . وخدولكو هالقصة اللي حصلت معي وانا في مطار بولندا : كنت انا واخويا في مطار بولندا واحنا فلسطينيين وفي مجموعة كبيرة من الاسرائيليين سألناهم من وين انتو ؟ جاوبونا احنا من القدس ,بعقلي حكيت انا يعني من اسرائيل وهما اللي بطلعو من القدس ,المهم كنا علي نقطة التفتيش بالمطار كل المجموعة الاسرائيلية مرت ب 5 دقائق هادي النقطة, في حين انا وماجد ضلينا ساعة وهما بعملو اتصالات يفوتونا ولا ما يفوتونا ,معرفتش شو اعمل ,اعيط ولا اضحك ولا انقهر ولا شو؟ المهم قررت اني اضل أغني مشان ابين الهم انو انا قوية وما قدرو يحسسوني بالذل بس فعلياً احنا مذلولين .
4- فلسطيني يعني تكون بتحلم كتير واحلامك هاي تكون بسيطة كتير بس ما بتقدر تحققها . مثال بسيط :انا نفسي اروح عالقدس بس بقدرش أروح . ليش طيب ؟ يمكن مشان حكوماتك باعو القدس من زمان ,يمكن مشان شعبنا هلأ صار يدور علي بنزين وخبز وبيت ,صار بس بدو يعيش مستور ,يمكن مشان الشباب الفلسطيني صار في عندهم قضايا اهم من قضية فلسطين ؟ بعرفش شو السبب بس انا ببساطة بدي أروح عالقدس لو سمحتم!
5- فلسطيني يعني أول سؤال رح تنسألو لما تتعرف ع حدا فلسطيني جديد ازا انت حمساوي ولا فتحاوي ولا جبهة شعبية ولا جبهة ديمقراطية ولا جهاد اسلامي ولا حركة الاحرار ولا حزب التحرير ولاشو! حرد عليهم بكل ببساطة انا فلسطينية!
6- فلسطيني يعني شاف كل وجوه المعاناة من قتل ,أسر ,هدم بيوت ,فقر,بطالة ,انغلاق  فكري ,تقييد حريات ,طمس تراث ,وانقسام والخ .
7- فلسطيني يعني الناس ما بتخلصش كلام ,يعني ما بنهتم لا لدين ولا لمبادئ ولا لاشي ,بس بنهتم لشو الناس بدها تحكي!
8- فلسطيني يعني الناس وصلو القمر ولسا احنا بنصف طوابير مشان ناخد سولار وصرنا نحط سيرج للسيارات.
9- فلسطيني يعني تتعب وانت بتفكر وبتحلم وبتطمح وبتشتغل وبتدرس والله أعلم ازا تعبك رح يجيب نتيجة ببساطة لإنو بلدك أرض مش خصبة لتحقيق الأحلام والطموحات.
10-  فلسطيني يعني تموت واحلامك البسيطة لسا ما تحققت .مثلا ستي كانت كل يوم تحكيلنا حكاية من بيت جرجا وماتت وهيا بتحلم ترجعلها بس ماتت ولسا الحلم بعدو ما تحقق.
11- فلسطيني يعني تمشي في الشارع وانت خايف ,مش حاسس بأمان ,حاسس انو رح تموت في انقلاب ,بقصف ,حدا يخطفك ,حدا يتحرش فيك والخ .
12- فلسطيني يعني بدك تقضي عمرك تدور ع وسيلة تطلع من بلدك لانو ببساطة بلدك غير صالحة للعيش فيها .
13- فلسطيني يعني بدك تضلك تقارن بين حياتك وحياة الكلاب في اوروبا وبالاخر بتطلع حياة الكلاب أحسن.
14- فلسطيني يعني يكون كل شي بالشارع بيكون طوابير بس مش معناه انو نظام لا بس معناها معاناة ,مثلا موجود عنا طابور الرواتب ,طابور السولار ,طابور المؤن ,طابور الناس علي المخبز والخ.
15- فلسطيني يعني تكون عايش بحصار ,مش بس حصار سياسي ,لا وحصار اقتصادي وفكري وديني واجتماعي .
16- فلسطيني يعني الطفل من اول ما يبدأ يحكي بكون بحكيلك بالسياسة وبفهم أكتر منك . أحكيلكو فرق بسيط بين كيف بيتربي الطفل في فلسطين وكيف بتربي الطفل في أوروبا ,كانت صديقة مستضيفاني في بيتها لمدة أيام في السويد وكان تخاف تحكي لطفلها اللي عمرو 8 سنين عن الحرب علي غزة مراعاة لمشاعرو ونفسيتو .
17- فلسطيني يعني ازا سافرت بتكون اكتر واحد محظوظ بالعالم وكل الناس بتحسدك.
18- فلسطيني يعني الشب والصبية يحبو بعض من تحت الطاولة ويشردو من مطعم لمطعم ومن ورا اهاليهم ومش مسموح غير حب الله والرسول ,الوطن ,والعائلة.
19- فلسطيني يعني بدك تدور بالاخر علي مكان تهرب عليه من كل شي علي أمل انو ترتاح ,بس بدي أطمنكو
انو مش ترتاحو لإنو وين ما تروحو وطنيتكو ما رح تقل .

20-فلسطيني يعني لو تموت من الجوع بس ما رح تذوق الاهانة . صحيح انو احنا ما عنا ملايين بس عنا عز ونخوة وشهامة . الحمد لله! اضافة من رفيقتي غيد قاسم من الناصرة


ملاحظة: أنا بكره نظام المقارنات بس لازم نعرف شو هيا قيمة الانسان في فلسطين وايمتي بدو يصير الانسان عنجد انسان

 578074_10150946467274966_759549965_13109322_1654414946_n                            

المهم بعد هالتدوينة , انا مسمية المدونة تبعتي "فلسطين تمام " يعني فلسطين مية المية ومش ناقصها ولا شي الا شوية حجات ,ماعلينا حكيت كتير يا إما لإني برامة او لإنو الواحد مش ممكن يخلص يشكي ويبكي ,  بس بدي احكي اشي ايجابي اللي هوا انو رغم كل شي احنا لسا عايشين او بنحاول نتعايش ,لسا ضايلين بنحب الحياة وبنحكي "علي هذه الأرض ما يستحق الحياة" وبنحاول شوي صغيرة مشان نعيش حياة ماشي حالها وبالنهاية بنبوس ايدينا وجه وقفا وبنحكي الحمد لله علي هالنعم واحفظهم من الزوال . وباختصار احنا الفلسطيينيين رح نضل نحب فلسطين رغم كل شي .